Kumpulan Puisi Iswan Sual

Pangtipu

Bilang kata tampa tamping aspirasi

Tampa mahluk-mahluk suci

Mo berjuang demi torang sampe mati

Nyatanya ngoni jago skali ba ruci

Bilang kata demokrasi

Biar samua serasi

Mo beking sejahtera sana sini

Padahal kote ngoni papancuri

Bilang kata samua for kemajuan

Biar ilang tu kemiskinan

Satu sanang laeng sanang

Baru ta tau skarang ngoni ontak udang

Gara-gara ngana

Ancor tu basudara

Gara-gara ngana

Rusak tu keluarga

Satu dulu skarang ta pica

Rukun dulu skarang so kacau

Torang nda sadar torang Minahasa

Orang pusat ja adu domba

Kyapa torang nda rupa Aceh

Nda trima dorang prenta-prenta?

Kalu dorang ada partai local

Kyapa torang tatudi maker?

Kalu Bukang Torang, Sapa?

Lala kita babataria

Smo amper kaluar lida

Smo tacura  aer mata

Dorang nda taru kira

Pe gampang ja anggap susa

Nda bole mo paksa gampang cilaka

Musti sabar spaya dorang brusaha

Serta pande baru tarasa

Karna gratis, musti skola

Spaya nanti ngoni nda iko mata

Blajar beking pengetahuan tatamba

Karna ilmu bekal torang sampe tua

Sapa mo bangun tu desa?

Kalu bukang torang, sapa?

Beking mama papa bangga

Bakarya deri masi muda

Toar Lumimuut pasti kecewa

Lia pa torang cuma bahaga

Beking malu Minahasa

Beking susa sudara

Terima Gaji Buta

Dapa lia gaga

Lengkap deng sragam

Mar saban hari terlambat

Di muka murit se tunjung galak

Stel pande padahal kosong

Pulang cepat datang kablakang

Se tinggal klas ba kumpul kong ba flas

Nda sabar tunggu gaji

Tu tugas nda perna jadi

Siswa-siswi ta biar sandiri

Nda blajar dari pagi ta biar tu generasi

Dorang lupa dorang pe janji

Nda suka mo berbakti

For gaji ngana bakuriki

Padahal satu siswi tu stenga mati

Pemerenta musti rajin evaluasi

Ni panutan so lebe bajadi

Di sini bukang tampa ba aksi

Se rayo ngana pe gengsi

Kalu nda tau mengajar

Jang tuntut mo dapa bayar

Ngana pengajar mar ontak kurangajar

Dua Iris Nasi Jaha deng Kopi Gelas Tinggi

Laju bola-bola motor bakudusu

Beking lubang panta tabuka tatutu

Ahirnya kita deng maimuda sampe deng slamat

Sama deng da harap-harap

          Parkir motor lepas helem

          Maimuda ambe hape batelpon

          “Oma di ruangan mana?”

          Stenga bataria dia batanya

Skarang torang di Kalooran

Satu-satunya ruma saki di Amurang

Ruma saki sumbangan Kyuya Tamura

Bukang maen pe pambae ni orang Jepang

          Kadalang torang bajalang

          Blum banya dapa lia orang

          Dokter-dokter mungkin masi manggoro

          Suster le sto masi dabapolo

Sampe di kamar-oma tong taru helem

Kaluar kita bajalang

Cari ingin cari tampa basandar

Maimuda le iko kaluar

          Tampa ini for orang yang suka bae

          Beda skali deng di Malalayang

          Orang bakususung banya nyawa malayang

          Mar tu dokter pe playanan besae

Banya ruma saki suka-suka kalu torang saki

Supaya uba abis

Dokter-dokter kaya raya

Biar kasiang torang jual kobong jual tana

          Uba-uba da beking for mo jual

          Bukang mo se bae orang saki

          Perawat-perawat pili-pili tu kenal

          Pili kasi dorang melayani

Orangtua se skola anak

Jadi dokter, jadi suster

Biar dorang jadi barol pegang pistol

Pake puti dapa lia suci dorang bastel

          Di lante kita dudu baca karya Girot Wuntu

          Orang besar yang pemerenta tudu

          Da tudu babunu jendral

          Kong menderita 18 taun di sel

Aer mata amper malele

Renungkan Suharto deng CIA pe besae

Tangka deng bunung torang pe tete-tete

Padahal banya berjuang lama tapisa deng nene

          Kage-kage Della datang

          Ilang samua tu da tabayang

          Di muka tateru nasi jaha dua potong

          Nda rekeng tiga tasisa daong

Kopi di gelas tinggi kita cigi

User dingin bacucu ni pagi

Sambil bilang makase pa tete manis

Yang depe berkat nda perna abis

          Makase karna so jadi ombong

          Makase so jadi cahaya

          Ngana pegang deng ciong

          Ngana beking kita ada harga

Lebe Bae Ngana Tatawa

[Surat Wasiat Penulis]

Kalu kita mati nda perlu ngoni ba stenga mati

Nda usa sadia peti kalu nda cukup tu di popoji

Samua itu so nda da arti

Cuma beking tenaga abis malayang doi

Karna orang mati nda makang puji

Nda suka ingkar janji

Di dalam kubur samua so nda ada lagi

Cuma nama nda pigi

Kalu kita mati lebe bae ngana tatawa

Inga waktu torang sama-sama

Tiap minggu maso greja dengar firman Allah

Berguna nanti di alam baka

Lebe bae pikir ngoni pe hidop beso

Siap diri deri tempo

Spaya nda da pa bingo-bingo

Ato sampe jadi seno

Mati itu hari kubur itu hari

Se ilang kumawus se buang ampa pulu hari

Itu kwa cuma tradisi kosong

Kurang sekedar prong

Torang kase jang baharap bale

Mar kyapa dorang bangke-bangke

So sama deng tukang rente

Orang susa so siksa gigi jare

Dapa tolong asal ada tu mo se gade

Di Bawa Pohong Mangga

Di bawa pohong mangga angin batiop plang

Goso-goso lombo tape kuli

Bunga bonsai bagoyang tangang

Ta Cuma lia kong mangingi

          Opa pegang sapu pigi bale

          Anak-anak haga pohong suka nae

          Orang-orang batunggu

          Batunggu kluarga pasien mo bae

Angin raba plang ta pe muka

Salib-salib mera tagantong di pinggir jandela

Panas panggang bumi tengari tua

Baforo torang di pohong mangga

          Salib-salib mera botol bekas

          Tanda paska datang lakas

          Di ujung mana nda da salib

          Sayang, banya nda tau depe arti

Angin batiop babuju manis

Asik tu laki-laki batulis

Batulis tentang soal yang mata dapa riki

Tentang soal bagitu kacili

          Angin batiop bakile sadap

          Dari barat kirim pesan

          Angin batiop langit mulai gelap

          Ada berita bahwa akan hujan

Ta pe hati bakuku, “Ujang jo!

Sirang jo, kase anyor tu daki-daki”